DSWD ug Habitat nagtukod og hospital nga tolda

CEBU, Philippines - Ang Department of Social Welfare and Development sa Central Visayas (DSWD-7) sa pakig-alayon sa Habitat for Humanity nakakompleto na sa ilang konstruksyon sa makeshift hospital tents didto sa mga  lungsod  sa Carmen, Loon, ug Sagbayan sa probinsya sa Bohol.

Matud pa ni Semeon Remata III, kini gitukod sa tinguha nga matubag ang medikal nga panginahanglan sa mga pamilya nga apektado sa miaging linog nga miigo sa probinsya sa Bohol.

Dugang pa ni Remata nga ang maong hospital tents gitukod  sa  mga  Habitat uban  sa pakig-alayon  sa  mga kadagkoan  sa mga district hospitals ug municipal health officers.

Si Remata nagkanayon nga dugang hospital tents usab ang gitukod didto sa lungsod sa Tubigon, Sagbayan, Clarin, Calape, Buenavista, Inabanga ug usab sa Loon.

Sayo  niini  gibutyag  ni  Kalihim  Corazon Jualiano  Soliman  nga  kining  maong  mga  tolda gitumong  alang  sa mga  pamilya  kansang  balay  hingpit  nga  nagusbat  ug  usab  niadtong  igo  lang  nga  mitakilid apan  di gihapon  kapuy-an  human  sa maong  linog.

Midugang  siya  nga  ang  maong  mga tolda  gigama  sa sin  nga atop,  mga alambre,  kabilya  ug  uban  pa.

Samtang sumala pa usab ni Vince Delector Jr., manager sa Water Sanitation and Sustainable Operations Team of Habitat for Humanity nga ang ubang 10,000 ka core shelter kits anaa na, samtang ang laing 2,000 ka core shelters ipaulahi  lang  sa pagtukod.

Gianunsyo ni Delector nga ang Habitat for Humanity magsugod sa konstruksyon niini didto sa Barangay Manticida sa Catigbian nga  usa  sa labing nasabak  pag-ayo  sa kalamidad didto  sa  Bohol.

Hinuon  miingon  siya  nga  ang  mga  balay  nga  ilang  tukoron gamitan  og  mga  kawayan, semento  kansang   mga steel  frame ipasukad  usab sa  semento  sumala  pa  ni  Delector.

Ang Habitat for Humanity usa sa labing  karaan  na  nga  kaabag  sa DSWD sa natad sa pagpatukod og puloy-anan sa mga biktima sa nagkalain-laing kalamidad. (/WC)(BANAT NEWS)