Investigation report sa SBMI gidala na sa Manila

CEBU, Philippines - Nahatud na sa Special Board of Marine Inquiry ang investigation report kalabot sa panagbangga ug pagkalunod sa MV Saint Thomas Aquinas ug MV Sulpicio Express Siete diha sa Lawis Ledge sa kadagatan sa Talisay City niadtong Agosto 16 sa gabii.

Si Lt. Johansen Fabilane kinsa usa ka abogado ug sakop sa SBMI nagkanayon nga ilaha nang gihatud ngadto sa Board of Marine Inquiry (BMI) ang resulta sa imbestigasyon.

Ang pangulo sa Philippine Coast Guard –Cebu Station nga si Weniel Ascuna miingon nga ang BMI mohatag sa resulta ngadto sa commandant kinsa maoy mohatud usab ngadto sa Department of Transportation and Communication (DOTC) human sa iyang mga rekomendasyon.

Ang DOTC maoy motuon sa resulta sa imbestigasyon ug rekomendasyon alang sa paghimo og final approval.

Ang DOTC mao usab ang matud pa mopa-publikar sa resulta sa imbestigasyon sa mga nag-unang pamantalaan ug sibyaanan aron masayran sa publiko ang nahitabo.

Ang DOTC usab maoy motan-aw kung si kinsa ang sad-an sa panagbangga ug kung kinsay manubag.

Matud pa nga ang nag-unang kihante sa maong kaso mao ang Coast Guard ug ang DOTC. Apan mahimo usab nga mopasaka og kaso ang mga survivors ug kabanay sa mga nabiktima batok sa mga hingtungdang shipping lines nga mao ang Sulpicio ug 2Go Shipping. Kagahapon hingpit nang nahuman ang pagsuyop sa unom ka mga nahibiling tangke sa lana gikan sa nalunod nga barko sumala pa ni Commodore William Melad kagahapon. (BANAT NEWS)