Petrolyo sa barkong nalunod gisugdan na og suyop

CEBU, Philippines - Gisugdan na kagahapon ang pagpasuyop sa nahabiling lana sa nalunod nga barko M/V Saint Thomas Aquinas didto sa Lawis ledge taliwala sa pag usab-usab nga schedule niini.

Kini matud ni Weniel Azcuna, station commander sa Philippine Coast Guard kon PCG sa gipahigayong Command Conference kagahapon sa Cebu City hall.

Gumikan sa siphoning gihunong usab sa Malayan ug PCG technical divers ang retrieval operations sa mga patay’ng lawas.

Matud ni Azcuna nga gibana-banang karong umaabot nga Septiyembre 28 mahuman na ang siphoning nga mas sayo sa orihinal nga timeline nga Septiyembre 30.

Dugang ni Azcuna nga sa Oktubre 8 pagahimuon usab ang mobilization sa pagtangtang sa mga gamit sud sa nalunod nga barko.

Gibutyag usab ni Azcuna nga gamay na lamang ang nahabiling oil hinungdan nga di kinahanglan pa og chemical dispersants.

Samtang kagahapong buntag samtang padayon ang siphoning usa ka patay’ng lawas nga gikatahong lalaki ang naglutaw-lutaw didto sa Lawis Ledge.

Matud ni Azcuna nga ang patay’ng lawas gidala dayon sa Cosmopolitan Funeral Homes.

Sa pagkakaron 21 na lamang ang padayong gipangita samtang 47 ang wa pa gihapon mailhi gawas sa 116 nga mga patay.  (BANAT NEWS)