Koreano mihatag og 20 ka bombilya sa Mandaue

CEBU, Philippines - Mihatag  og 20 ka mga suga nga dagitabnon  ang Taeyoung International Dael Protech Co. Philippines  alang  sa kadalanan  sa dakbayan sa Mandaue  kagahapon.

Ang presidente sa maong kompaniya nga si Anthony Lee  usa  ka Koreano, ug mga opisyal  niini  mibisita  sa buhatan ni Mayor Jonas Cortes diin  didto  himoa  ang   ceremonial turnover sa duha ka induction lump nga   tag 150W.

Si Lee  mipasabot nga ang duha ka mga induction lamp    kauban  sa 20 ka  suga   nga ilang gitaod sa pinili nga mga dalan sa dakbayan sa Mandaue.

Gipaniguro ni Lee nga ang maong matang sa mga bombilya  magsilbi nga sample  ug ikatandi  sa   uban pa nga matang sa mga sugang dagitab nga kasamtangang  gigamit sa kadalanan sa nagkalainlaing lokal nga kagamhanan.

Gipaniguro ni Lee nga ubos og  P40 ang presyo sa maong matang sa mga suga ug 40 porsiyento usab ang labaw sa  uban  ang  kahayag   niini.

Midugang si  Lee  nga  gawas nga makadaginot sa konsumo,  dugay  kini  mapunder  itandi sa uban nga mga bombilya.

Si Mayor Cortes   mipadayag  usab  sa iyang   kahinangop sanglit   napili  ang  dakbayan sa Mandaue  nga  hatagan  sa maong  mga  suga.

Gitug-an ni  Lee  nga  gumikan  kang Jonathan “Jonee” Gesalem   kinsa  magpapatigayon sa  Mandaue  nga  iyang  higala  mihatag  siya  niining  mga  sugaa.

Si  Gesalem nga nahinabi sa Banat News miingon nga iyang gipili ang dakbayan nga maoy makadawat sa maong donasyon tungod kay  labi  kining  nagkinahanglan  niini.

Gipasabot niya nga ang dakbayan sa Mandaue maoy  sentro nga dapit sa lalawigan sa Sugbo nga ang tanang sakyanan nga nagdagan nga mopaingon sa habagatan, amihanan ug tugpahanan sa abyon nga Mactan Cebu International Airport   anha  gayud moagi  sa iyang  mga  kadalanan. (BANAT NEWS)