Dul-an sa P500 mil kantidad sa shabu nasakmit
CEBU, Philippines — Niabot ngadto sa 70 gramos nga shabu nga nikantidad tanan ngadto sa P476,273 ang nasakmit atol sa gipahigayong buy-bust operation sa kapolisan sa Presinto 4 sa Lapu-Lapu City Police Office (LLCPO) sa nilabay’ng adlaw diha sa Sitio Marbeach sa Barangay Marigondon sa Siyudad sa Lapu-Lapu.
Si Police Lieutenant Colonel Joey Bicoy, hepe sa City Intelligence Unit (CIU) sa LLCPO niila sa suspetsado nga mao si Norman Amistad Aparece, hingkod ang panuigon molupyo sa Barangay Pajac sa maong siyudad.
Matud ni Bicoy nga si Aparece ang nadakpan na kaniadto sa pagpamaligya og shabu ug nakaserbisyo na sa kaso nga giatubang niini hangtud nga nakagawas ug ilang na-monitor nga nibalik gihapon kini sa pagpamaligya og shabu.
Si Police Colonel Elmer Lim, direktor sa LLCPO nagkanayon nga nagpadayon karon ang ilang gihimo nga pag-monitor sa mga nakagawas na sa bilanggoan nga mga drug pusher.
Dugang ni Lim nga dako ang kahigayonan nga mobalik kini sa naandan nga ilegal nga kalihokan ilabi na kon wala kini trabaho o panginabuhian. (BANAT NEWS)
- Latest
