Tinun-an sa Grade 8 nakuhaan og shabu

CEBU, Philippines —  Usa ka Grade 8 nga estudyante ang nadakpan sa gipahigayong buybust operation sa Drug Enforcement Unit sa Talisay Police Station Sabado sa hapon sa Villa Laguna, Barangay Cansojong, Syudad Talisay.

Ang dinakpan giila nga si Jomel Amor Pardillo 18, residente sa Sitio Barangay Kinasang-an, siyudad sa Sugbo.

Nakuha gikan sa dinakpan ang lima ka medium nga paketeng giingong shabu nga mobalor og 170,000 pesos.

Matud pa sa dinakpan nga igo lang siya gi text-san nga ihatud ang maong drugas sa dapit bugti sa suhol. Apan nagdumili siya pagtug-an kung si kinsa ang nagsugo kaniya.

Samtang sa lain tulo ka mga tawo ang nadakpan sa PDEA-7 atol sa gipahigayon nga buybust operation sa Sitio Calachoce , Barangay Busay, Syudad sa Sugbo. 

Ang mga dinakpan giila nga si Benje Marintes  Villapranca ,49, Jessie Joy Navaja,33, ug Eugene  Malinao Uy ,50.

Ang mga dinakpan nakuhaan og 11 gramos sa  giingong shabu nga mobalor og P74,800.

Nadakpan sab sa buy bust operation sa kapolisan sa Presinto 5  sa Mandaue  City Police Office (MCPO) ang tulo ka gidudahang drug pushers  diha sa Barangay Looc sa Siyudad sa  Mandaue.

Si Police Major Erwin Abrasado, hepe sa Presinto 5 sa MCPO miila sa una nilang nadakpan nga mao si Peter John Caparoso, 26, nga nakuhaan og pinutos nga gidudahang shabu.

Dugang nadakpan mao ang Senior High School nga tinun-an nga  si Erica Harris, 20, taga Barangay  Pajo  sa Siyudad sa Lapu-Lapu.

Nadakpan usab ang pusher nga Bryan Maglasang, 35, nga nakuhaan usab  og usa ka bulto nga shabu.