Canyoneering sa badian gipahunong ni Garcia

CEBU, Philippines —  Nimando si Gobernador Gwendolyn Garcia nga temporaryong ipasarado ug isuspenso ang canyoneering nga kalihokan diha sa Matutinao sa lungsod sa Badian.

Usa ka executive order ang giluwatan ni Garcia kalabot niini diin sa maong EO matud sa Gobernador nga usa ka pagsusi ang gihimo sa pipila ka buhatan sa Badian sama sa Municipal Engineering Office, Municipal Disaster Risk Reduction and Management Office, Municipal Environment and Natural Resources ug uban pa niadtong Pebrero 16, 2023 didto sa Kawasan Falls.

Ang canyoneering site didto sa Badian apil na ang Kawasan Falls maoy apil sa mga tourism destination sa lungsod nga nakaangkon og grabeng kadaot human sa pagkuso kuso sa bagyong Odette niadtong Disyembre 2021.  Matud sa Gobernador, atol sa gihimong inspeksyon adunay mga “hazardous metallic spikes ug mga struktura nga ilegal nga gitukod sa giila nga easement zone didto sa Kawasan Falls.

Ang Provincial Environment and Natural Resources Offices (PENRO) nihimo usab og inspeksyon sa abandonado nga CEBECO Dam usa sa mga canyoneering trails sa Kawasan diin adunay nakita nga delikado nga passage o agianan sa tubig kilid sa dam nga kinahanglan aksyonan.

Bisan ang Department of Environment and Natural Resources – Environmental Management Bureau (DENR-EMB) uban sa mga opiyal sa LGU base sa ilang gihimong report nagkanayon nga kinahanglan nga mohimo og aksyon sa mga ilegal nga estruktura sa maong dapit paglikay sa disgrasya sa publiko hilabina sa mga mopahigyaon og canyoneering activity.

“any injury or mishap resulting from the gross neglect of the possible dangers that these illegal structures and dangerous ruins may cause to the public would definitely adversely affect the tourism industry of Cebu” pagbasa sa EO ni Garcia.

Kini ang hinungdan nga gipasarado ug gipahunong usa sa gobernadora ang canyoneering activity didto sa Badian. 

Gimandoan ni Garcia ang kapolisan sa lungsod nga estriktong ipatuman ang kamandoan niini.