Gipusil sa riding in tandem nakabantay ug nakahupo
CEBU, Philippines — Gibutyag ni Police Colonel Ireneo Dalogdog, direktor sa Cebu City Police Office (CCPO) nga gisuta nila ang background ni Elmar Danong, 53-anyos, molupyo sa dalan Urgello, Barangay Sambag 1, Dakbayan sa Sugbo nga gipusil sa riding in tandem niadtong Huwebes sa gabii.
Si Danong wala kini maigo human nakahupo ug nakapasalipod sa poste sa coffee shop nga iyang gidumala.
Buot sutaon sa kapolisan ang negosyo ug trabaho sa biktima o aduna ba kini nakalalis kaniadto sa mga kaubana o kaila niini nga posible nga maoy hinungdan sa pagpusil kaniya.
“Sumala sa gibutyag sa atong imbestigador ang kining maong biktima naa sulod sa cafe nga gipanag-iya sa iyahang girlfriend unya naay duha ka unidentified individuals nga nikalit og pamusil maayo nalang gani wala siya maigo”, matud ni Dalogdog.
Gitahasan ni Dalogdog ang mga imbestigador nga subayon ang nahitaboan pamasin nga adunay makuha nga footage close circuit television (CCTV) nga makatabang aron mailhan ang mga kriminal.
“Akong giingnan ang imbestigador nga i-follow up para masuta nato unsay possible nga motibo sa maong mga assailants”, dugang ni Dalogdog.- BDB (BANATNEWS)
- Latest