Nipuli ni Degamo namatay sa sakit

CEBU, Philippines — Mipaabot sa ilang pahasubo ang Police Regional Office (PRO)-7 ubos sa leadership ni Police Brigadier General Anthony Aberin ngadtong sa pamilya ni Negros Oriental Governor Carlo Jorge Joan "Guido" Reyes kinsa mipanaw kagahapon. Una niini, gikompirmar ni Provincial Administrator Atty. Karen Lisette Molas ang pagpanaw ni Gov. Guido human nga gipahibawo sab siya sa anal sa gobernador.

Si Reyes namatay duha ka buwan human kini mipuli kang kang Governor Roel Degamo nga gipatay sulod sa panimalay niini sa Lungsod sa Pamplona niadtong Marso 4 ning tuiga.

Daghan ang nakuratan sa kalit nga kamatayon ni Guido apan wala malilong sa publiko nga duna kini gihambin nga balatian.

Ang PRO-7 miingon nga ang kalit nga pagpanaw sa gobernador usa ka temporal set-back sa mga pagbangon sa mga tawo sa Negro Oriental human sa nahitabong masaker didto sa Pamplona nga diin namatay si Degamo ug siyam ka mga tawo.

Gihulagway sa PRO-7 nga usa ka maayong lider si Reyes ug mahinumduman gyud sa mga Negrenses ang dedikasyon niini sa pag-serbisyo sa katawhan.

"As one of our partners in peace and security, PRO 7 is saddened and may his soul rest in eternal peace with our Almighty God," tipik sa post pamahayag sa PRO-7.

Kagahapon nanumpa na si Vice Governor Manuel "Chago" Sagarbarria isip bag-ong gobernador sa Probinsiya sa Negros Oriental. Kahinumdoman sab nga si Degamo board member lang kaniadto apan siya maoy mihulip sa posisyon sa bise gobernador nga si Agustin Perdeces kay ang naulahi nilingkod man sa pagka-gobernador tungod sa kamatayon ni Gob. Emilio Macias II.

Apan paglabay sa unom ka buwan, namatay sab si Perdeces tungod sa sakit hinungdan nga si Degamo maoy milingkod isip gobernador.

Apan niadtong  Marso ning tuiga, gipatay si Degamo hinungdan nga si Bise Gob. Reyes maoy mihulip kaniya, apan karon namatay sab tungod sa sakit. (BANAT NEWS)