Duha ka durugista sa Cebu City ug Lapu-Lapu sikop sa buy-bust

CEBU, Philippines — Nakuhaan og 105 gramos nga shabu nga mobalor sa dul-an P1 milyon ang 26- anyos nga lalaki atol sa buy- bust operation nga gipahigayon sa City Intelligence Unit sa Cebu City Police Office niadtong Miyerkules sa gabii diha sa dalan Flordeliz, Barangay Bulacao, Siyudad sa Sugbo.

Nagtingkagol sa detention cell sa kapolisan si Jobert Labiaga Bequiso alyas “Bidie” nga usa ka giingong high value individual.

Ang kapolisan sa Dakbayan sa Sugbo nakadawat og impormasyon kalabot sa ilegal nga kalihokan sa suspetsado.

Base sa report sa CIU-CCPO giingong maka-dispose ang suspetsado og 150 gramos nga shabu.

Ug dili lang sa Barangay Bulacao ang area of operations niini apan apil na ang mga silingang barangay sa siyudad.

Sa laing bahin,  Nasakmit ang armas ug mga pakete nga shabu gikan sa pusher nga nadakpan sa buy-bust operation sa kapolisan sa Presinto 2 sa Barangay Mactan,  Siyudad  sa Lapu-Lapu.

Si Police Major Jeffy Dagame, hepe sa Presinto 2 niila sa suspetsdo nga mao si Emerson Cavan, 46-anyos, nagpuyo sa maong dapit.

Si Dagame nagkanayon nga nakadawat sila og mga taho kalabot sa ilegal  nga   kalihokanan ni Cavan diha sa maong lugar.

Nasakmit sa mga polis gikan sa suspetsado ang mga pakete nga shabu nga nikantidad tanan ngadto sa P27, 000 ug kalibre .38 revolver nga adunay duha ka bala.

Ang mga suspetsado gikatakdang pasakaan og tukmang kaso sa nahimo nila nga kalapasan. —Romeo D. Marantal, Romeo T.  Limpagog (BANAT NEWS)