Asawa gitigbas, gidunggab patay sa bana gumikan sa selos

CEBU, Philippines — Patay ang usa ka asawa human kini gitigbas ug gidunggab sa iyang bana human usab sa ilang panaglalis gumikan sa selos diha sa Sitio Ibabao, Barangay Poblacion, Lungsod sa Tabuelan niadtong Martes sa gabii.

Ang biktima mao si Janice Gutib Olivo, 36-anyos ug ang suspetsado ang bana niini nga si Homer Purisima Olivo, 48-anyos ug aduna sila’y duha ka anak nga nag-edad og 6-anyos ug 10-anyos.

Matud ni Police Staff Sergeant Jerome Millor, imbestigador sa Tabuelan Municipal Police Station nga pasado alas 10:00 sa gabii sa nahisgutang adlaw usa ka concerned citizen ang nitaho diha sa ilang buhatan kabahin sa maong hitabo.

Ang mga polis nga nialarma naabtan niini ang biktima nga wala na’y panimuot ug naligo kini sa kaugalingong dugo ug napuno sa tinigbasan ang lawas niini.

Gigamit sa suspetsado sa pagtigbas ug pagdunggab sa iyang asawa mao ang sundang ug kitchen knife.

Gidali pa pagdala ang biktima ngadto sa Tuburan District Hospital apan gideklara kini sa doktor nga patay na nga naabot sa tambalanan.

Ang suspetsado nasikop sa mga polis diha usab sa lugar nga nahitaboan.

Ang suspetsdo giingong nitug-an ngadto sa mga polis nga nag-away sila sa iyang asawa gumikan sa selos tungod kay nagtuo siya nga adunay laing lalaki ang iyang asawa.

Human sa panaglalis sa magtiayon nigawas ang suspetsado sa ilang panimalay apan paglabay sa pipila ka minuto nibalik kini og sulod sa balay nikuha og sundang ug kutsilyo ug deretso nga nisulod sa kwarto nga nahimutangang sa biktima ug sa walay pagduha-duha gideretso niini og tigbas ug dunggab ang biktima.

Human sa hitabo nigawas ang suspetsado ug gibilin ang sundang ug kutsilyo ug nagpahibawo sa iyang ugangan nga napatay sa suspetsado ang iyang asawa.

Matud usab ni Millor nga sa pagdakop sa kapolisan sa suspetsado dili kini hubog apan wala sa iyang huna-huna ug giingong nasulod sa huna-huna niini nga patyon niya ang iyang asawa.

Giingong ang 6-anyos nga anak sa magtiayon nakakita sa gibuhat sa iyang amahan ngadto sa iyang inahan ug nidagan kini paingon sa gawas. (BANAT NEWS)