Mga pekeng sigarilyo nasakmit
CEBU, Philippines — Nasakamit sa mga operatiba sa Criminal Investigation and Detection Group(CIDG) Mandaue City Field Unit ang dul-an sa P700,000 nga kantidad sa mga pekeng sigarilyo atol sa ilang buy-bust operation diha sa Juan Luna, Barangay Looc, dakbayan sa Danao niadtong Martes sa gabii.
Nasikop atol sa maong operasyon si Fernando Gonzales Beduya, Jr., 59-anyos, negosyante, residente sa maong barangay ug giingong tag-iya sa mga pekeng sigarilyo.
Uban sa CIDG-7 Mandaue Field Unit ang BIR revenue 13 ug representante sa Phillip Morris Fortune Tobacco Company. Atol sa operasyon nakuha gikan sa suspetsado ang mga box ug rim sa nagkalain-laing matang sa sigarilyo.
Giingong si Beduya nakalapas sa Section 168.3(a) sa Akta Republika 8293 kun “Intellectual Property Code” ug Akta Republika 10643 kun “Graphic Health Warnings Law”.
Matud ni Police Captain Nigel Sandoy, hepe sa CIDG Mandaue City Field Unit nga ang agent sa Japan Tobacco Industry (JTI) nagpahibawo diha sa ilang buhatan nga giingong adunay namaligya og mga pekeng sigarilyo ug nangayo kini og tabang kanila aron pag-verify sa impormasyon.
Giingong ang operatiba nipalit og sigarilyo gikan sa suspetsado sa makadaghang higayon ug gipa-examine kini sa JTI.
Niadtong Lunes ni-oder sila og napulo ka box sa nagkalain-laing brand sa sigarilyo gikan sa suspetsado nga nagkantidad og P250,000.
Ang JTI nihatag og certification sa CIDG Mandaue City Field Unit nga naglatid nga peke ug ilegal ang sigarilyo nga gibaligya sa suspetsado. (BANAT NEWS)
- Latest
