20 ka opisyales sa barangay gi-monitor; tulo sa HVI nasikop

CEBU, Philippines — Niabot sa 20 ka barangay elected officials sa Central Visayas nga anaa sa drug watchlist ang gi-monitor sa Police Regional Office (PRO)-7.

Gipasabot ni Police Lieutenant Colonel Gerard Ace Pelare, tigpamaba ni Police Brigadier General Anthony Aberin, direktor sa PRO-7 nga ang maong opisyales gi-monitor nila tungod kay nisurender kini kaniadto aron mokooperar sa kapolisan.

Sukad sa maong hitabo gi-monitor sila sa kapolisan isip kabahin sa trabaho sa Philippine National Police (PNP) ug aron usab masuta kon wala na ba gyud sila nakiglambigit sa ilegal nga kalihokan.

Sa pagpangandam sa umaabot nga piniliay, si Pelare nagkanayon nga aduna nay pasiuna nga na-identify ang PRO-7 nga mga election watchlist areas ug nakapahigayon na usab sila og election related violent incidents.

Sa laing bahin, nikabat ngadto sa P940,000 nga kantidad sa shabu nga nasakmit sa mga  sakop sa City Intelligence Unit (CIU) sa Lapu-Lapu City Police Office  (LLCPO) gikan sa tulo ka high value individual atol sa managlahing buy-bust operation diha sa Barangay Mactan, Siyudad sa Lapu-Lapu.

Si Police Colonel Elmer Lim, direktor sa LLCPO niila sa suspetsado nga sila si Jonas Augusto Malingin, hingkod ang panuigo, taga Sitio Soong, Barangay Mactan ug nasakmitan og 50 gramos nga shabu nga nikantidad tanan ngadto sa P340,000; Julius Flores Amado ug Ronald Geraldizo Jumao-as, pulos hingkod ang panuigo, mga resdiente sa Sitio Lawis, Barangay Pasil, Siyudad sa Sugbo, nasakmit gikan sa mga suspetsado ang 75 gramos nga shabu. — Romeo T. Limpagog (BANAT NEWS)