Tinun-an sa criminology nadakpan buy-bust operation
CEBU, Philippines — Nahugno ang pangandoy sa usa ka 2nd year nga criminology student nga mahimong polis sa dihang kini nadakpan sa atol sa buy-bust operation sa Regional Police Drug Enforcement Unit-7 diha sa dalan El Felibusterismo, Barangay Ermita, siyudad sa Sugbo.
Ang nadakpan mao si Christian Broñola Dela Peña, 23, residente sa Sitio Kastilaan sa naasoy nga barangay. Nakuhaan siya og 505 gramong gituohang shabu nga mobalor og P3.4 million.
Sa pakighinabi sa mga balita kang Dela Peña kini miingon nga naaghat siya sa pagsulod sa ilegal nga kalihukan kay gusto niya makatiwas sa eskwela.
Matod sab sa dinakpan nga sa miaging adlaw lang siya nagsugod sa maong illegal nga kalihukan diin bayran siya og P10,000.
Giingong naa sulod sa prisuhan ang gasugo niya iyaha kining nakaila pinaagi sab matod pa sa iyang amigo.
Nasayran nga ang dinakpan gipaubos og usa ka semana nga surveillance human makadawat og impormasyon ang kapulisan sa illegal nga kalihukan niini.
Sa pikas bahin, 656.59 grams nga shabu nga mobalor og P4.4 million ang ang nakompiskar sa Cebu City Police Office (CCPO) sa 39 ka operasyon gikan sa Mayo 19 hantod sa 25 nga miresulta sa pagsikop sa 47 ka drug personalities.
Moabot sab sa 15 ka loose firearms ang nakompiskar atol sa police operations ug 12 ang nadakpan. Sa operasyon batok illegal gambling nakapahigayon sila og 53 ka operasyon nga miresulta sa pagkasikop sa 107 ka indibidwal ug pagkompiskar sa dul-an P7,000 nga balor sa kwarta.
Giaksyunan sab sa CCPO ang paggukod sa mga pinangita sa balaod diin 32 ka wanted persons ang nadakpan.
Sa 32 ka wanted persons 25 niini ang other wanted persons ug pito ang most wanted persons, resulta kini sa 77 ka operasyon nga nagpahigayon.
Ang wala’y paglubad nga police operations ug proactive crime prevention measures nakatabang sa pag-menus sa krimen base sa comparative crime statistics sa milabay nga mga semana. — Romeo D. Marantal, IBM (BANATNEWS)
- Latest
