Rider nga nidakop sa esnatser gipasidunggan sa CCPO
CEBU, Philippines — Gipasidunggan sa Cebu City Police Office ang usa ka rider nga konektado sa pribadong kompanya nga nagtanyag og motorcycle taxi service tungod sa pagsanta niini sa usa ka esnatser niadtong Mayo 24, 2023 diha sa may dalan Leon Kilat.
Matud pa samtang nagpaabot og pasahero, nakadungog ang maong rider (pangan gipugngan alang sa iyang seguridad) “esnatser gukuron.” Wala kini pagduha-duha nga migukod sa nanglabni hangtud nga naabtan niya kini sa dalan Colon.
Gipahunong niya ug gipahapa sa yuta hangtud nga nadakpan gyud ang isnatcher ug na-recover ang pitaka ug cellphone sa biktima.
Giangkon niya nga nakuyawan siya sa iyang gibuhat apan dako og natabang ang training nga naagian sa dihang tanod pa siya sa Barangay Sambag 2.
Gitug-an sab niya nga ikaduha na kining higayon nga dunay gitabangan nga nabiktima og esnatser.
Si CCPO Director Colonel Ireneo Dalogdog mihulagway nga talagsaon ang gibuhat sa maong rider maong ilaha kining gipahalipayan pinaagi sa paghatag og plaque ug cash atol sa flag raising ceremony sa Camp Sotero Cabahug kagahapon.
Matud ni Dalogdog gikinahanglan nila ang tabang sa tanan sanglit limitado ang pwersa sa kapulisan sa dakbayan sa Sugbo.
Nasayran nga dunay memorandum of agreement ang CCPO ug sa mga motorcycle taxi companies nga ang ilang mga riders motabang sa CCPO pinaagi sa pagpaubos kanila sa orientation sa lagda sa trapiko, paghatag og impormasyon sa kapulisan pinaagi sa pagtawag sa hotline numbers aron ma respondehan dayon. (BANAT NEWS)
- Latest
