Drug money gi-monitor sa SK, Barangay Elections

CEBU, Philippines — Nagpahinumdom ang Philippine Drug Enforcement Agency (PDEA)-7 sa mga magpapili sa umaabot nga Barangay ug Sangguniang Kabataan Election karong buwan sa Oktubre nga susihon gyud kun kang kinsa gikan ang pundong gisuporta kanila kay basin gikan kini sa illegal drugs.

Ang tigpamaba sa PDEA-7 Leia Alcantara miingon nga naniid na sila karon kabahin niini karon nga nagsingabot na ang election sa Barangay ug SK.

Panid-an sab sa PDEA kun kinsa kining mga mokantidado kun sila mga drug personalities bas a barangay, sa pagkakaron wala pay filing of candidacies.

Gihangyo sa PDEA-7 ang mga magpapili nga magmatngon sa mga dawaton nga suporta nga pundo para sa ilang pangampanya.

Matud pa kun makadaog man ugaling ang kandidatong gisuportahan og drug personality, himuon ra siyang itoy-itoy ug gamiton nga drug protector.

“Pag first wala gyud mo kahibawo but kaning mga drug personalities nato, atong mga kontra naa ni sila’y ilahang mga tools pud in their strategies unsaon mo pagpiit niya mao na maapil nalang hinoon mo,” sigon ni Alcantara.

Padayon ang validaton sa PDEA-7 sa impormasyon nga ilang nadawat nga giingong dunay pipila ka mga incumbent elected officials karon ang nalambigit sa illegal drugs.

Naghimo sab sila og financial investigation pag-monitor sa mga koneksyon sa mga drug personalities apil na ang dagan sa ilang kwarta kun maabot ba ngadto sa mga local officials o kandidato.

Ang PDEA ug Anti Money Laundering Council nagtinabangay aron maalerto sila kun dunay mga kadudahang accounts, kadudahan nga mga dinagko nga transactions, dinagko nga withdraw.

“With that, maka connect ta or maka identify ta aning mga personalities nga dili kaayo nato dali ma detect kay wala man sila naggunit sa shabu but they are still involved in the illegal drug transactions because they are holding the money so isa na atong gipanghingusgan karon the financial investigation,” dugang ni Alcantara.

Dako matud pa og tabang ang Inter-Agency Task Force sanglit dili lang ang PDEA ang mag-monitor apan lakip na ang ubang law enforcement agency sama sa PNP, NBI, NICA ug uban pa.

Gipaneguro sa PDEA nga ang mga impormasyon nga moabot sa ilaha i-validate gyud kay basin og gigamit kini pagpangdaot sa tawo ilabi na nga eleksyon na karon. (BANAT NEWS)