Hitman nadakpan sa drug bust

CEBU, Philippines — Nasikop ang gipasanginlang notadong gun-for-hire atol sa buy-bust operation sa City Intelligence Unit sa Cebu City Police Office pinangulohan ni Police Lt. Lyndon Mondragon niadtong Sabado sa gabii diha sa Belgium Street, Barangay Suba, siyudad sa Sugbo.

Giila ang dinakpan nga si John Bryan Belamia Fernandez, 35, residente sa Sitio Lawis, Barangay Pasil ning siyudad ug gikonsiderar nga usa sa High Value Individual sa kampanya konta ilegal nga drugas.

Si Fernandez nakuhaan og 55 grams sa shabu nga mobalor og dul-an P400 mil.

Duha ka semana nga gipanid-an si Fernandez tungod sa nadawat nga mga impormasyong nagbaligya kini og ilegal nga drugas, sa dihang nakompirmar ang report, gilusad dayon ang maong operasyon.

Matud pa si Fernandez maka dispose og 100 ngadto sa 500 gramong sa shabu sa usa ka semana ug dili lang Barangay Pasil ang area of operations niini apan lakip na ang mga silingang barangay.

Sa report sa kapulisan, si Fernandez usa sa mga gisuspetsahan sa nahitabong pagpamusil niadtong Marso 19, 2023 sa Sitio Bagong Silang, White Road sa Barangay Inayawan.

Gituohan nga sa pagkasikop ni Fernandez manenusan na unya ang shooting incidents sa dakbayan sa Sugbo.

Base sa mga nakuhang impormasyon, ang dinakpan gikatahong miangkon sa pipila ka mga kaso sa pagpamusil sa Dakbayan sa Sugbo.

Giingong apil niini ang matud pa pagpamusil nga nanghitabo sa Suba ug sa kadtong ginang sa atubangan nga sam-ang sa Carreta, mga pangangkong giberipika pa sa kapolisan.

Giangkon sa dinakpan ang kalisod ug sa kagustohan nga dali ang kwarta maoy nagtukmod kaniya sa paghimo sa paglambigit sa illegal nga drugas ug pagpanumba og mga tawo nga  naka dispalko sa halin sa ginadili nga drugas.

Ang dinakpan niangkon sab nga aduna pa unta kini laing tumbahon, duha sa Cebu City ug duha sa Talisay City. Sumala pa ni Cebu City Police Director, Ireneo Dalogdog, kining tanang impormasyon nga gitug-an kanila sa dinakpan ilaha subayon ilabi na nga nakuhaan kini og cellphone apil ang binayloay niini og mensahe sa usa ka notadong drug personality nga toa sa National Bilibid Prison.

Ang maong dinakpan giingong na priso na kaniadto ug didto nakahimamat og mga drug personality nga maoy nahimo niini nga amo. — Romeo D. Marantal ug Rowena Capistrano/IBM (BANAT NEWS)