Upat sikop, menor na-rescue atol sa buy-bust
CEBU, Philippines — Upat ka tawo sikop ug usa ka menor de edad ang na-rescue atol sa gipahigayong buy-bust operation sa Philippine Drug Enforcement Agency-7 diha sa Sitio Trinidad, Barangay Punta Princesa, Dakbayan sa Sugbo niadtong Huwebes sa hapon.
Ang nasikop mao si Clifford Llaban, 49-anyos, walay trabaho ug giingong tigmentinar sa drug den, mga parokyano nga sila John Paul Bacalla, 23; Mark Joseph Llaban, 25 ug Jenny Ruiz, 18.
Nasayran nga ang subject sa maong operasyon ang nakasibat.
Na-rescue atol sa maong operasyon ang 17-anyos nga bayong-bayong.
Nasakmit gikan sa mga suspetsado ang 24 ka putos nga shabu nga nitimbang ngadto sa 16 gramos ug nibalor tanan ngadto sa P109 mil, buy-bust money ug mga nagkadaiyang kagamitan sa pagsuyop og shabu.
Matud ni Leia Alcantara, tigpamaba sa PDEA-7 nga ang mga nadakpan bag-o kini nga naila nga drug personalities lakip na ang nakasibat.
Ang PDEA-7 padayon sa ilang monitoring and validation sa gikataho nga illegal activities sa mga drug-cleared barangay aron sa pagsiguro nga mamentinar ang ilang drug-cleared status. - BDB (BANATNEWS)
- Latest
