P1.5 milyong shabu ug armas nasakmit

CEBU, Philippines — Mokabat P1.5 milyong gituohang ginadili nga drugas ug armas ang nasakmit gikan sa usa ka 32-anyos nga lalaki atol sa buy-bust sa may Zone Ahos, Barangay Paknaan, Dakbayan sa Mandaue niadtong Huwebes sa kaadlawon.

Ang nasikop naila nga si Brinbren Yburan, High Value Individual, residente sa Magsaysay St, Barangay Suba ning Dakbayan sa Sugbo.

Nangulo sa maong operation mao si Police Captain Emmanuel Rabaya, OIC Station Commander sa Police Station 3 uban sa mga ginsakopan niini ug sa pakig-alayon sa PDEA-7.

Nasakmit gikan sa dinakpan mao ang 230.33 gramos sa gituohang shabu nga adunay standard drug price value nga moabot sa 1,566,244.00, usa ka .45 caliber nga pistola nga dunay mga bala ug buy-bust money.

Ang kapulisan padayon pa karon nihimo ug imbestigasyon may kalabutan sa background sa maong dinakpan ug kung nganung naabot usab kini sa maong dapit.

Samtang upat sab ka mga gipasanginlang durugista ang nadakpan sa sunod-sunod nga pagpahigayon og buy bust operation sa Dakbayan sa Talisay niadtong miaging adlaw.

Unang nadakpan mao sila si Jose Dela Victoria, 49, ug si Mark Lester Ravanes, 28, taga Purok Repolyo, Barangay Poblacion, Syudad sa Talisay.

Usa ka oras ang milabay, nadakpan sab si Christian Philip Ybañez, 39 anyos didto sa Barangay Cansojong sa nahisgutang Syudad.

Wa sab magdugay, nasikop si Danilo Balingit Jr. alyas Dabog, 34 anyos ngabtaga sitio Tunga, Barangay Tanke.

Si Police Lt. Col. Randy Caballes, hepe sa kapolisan sa siyudad nitataw nga subsob ang ilang pagpanakop sa mga tawo nga nalambigit sa ginadiling drugas ilabi na kadtong naa sa ilang listahan nga padayong namaligya niini. — Gabriel Bonjoc/IBM (BANAT NEWS)