Rama nimando sa OBO pagbawi sa sidewalk

CEBU, Philippines — Nakita ni Mayor Michael Rama ang pipila ka commercial buildings, hotel ug residential structures diha sa Gorordo Avenue nga mopaingon sa pipila ka bahin sa Cebu Business Park nga posibleng adunay mga kalapasan gumikan kay ang uban niini nakababag na sa mga sidewalk.

Nabantayan kini ni Rama kagahapon sa buntag samtang gisusi ang sitwasyon sa trapiko sa lugar subay sa gisugyot nga one-way scheme sa Banilad-Talamban.

Gimandoan ni Rama ang Office of the Building Official nga susihon ang mga orihinal nga desinyo ug giawhag niya ang ubang  hingtungdan nga departamento alang sa pagbawi sa sidewalk/setbacks.

Si Rama nipahigayon og walk-thru kagahapon ug mao kini ang iyang paagi aron  ang uban nga mga department head ug uban pang nagpakabana nga mga indibidwal ug ahensiya makakita sa tinuod nga kahimtang . Nihimo na usab og kamandoan si Rama ngadto kang City Architect Florante Catalan nga susihon ang mga istraktura nga klaro nga nagbabag sa mga sidewalk.

Nakita usab ni Rama ang pipila ka mga balay diin ang uban niini naabot na sa side walk ug gibotangan kini og tindahan.

Adunay mga kural usab nga gimarkahan nga nagpasabot nga kinahanglang gub-on tungod kay nakabara kini sa sidewalk.

Gitahasan usab ni Rama sila si Bise Mayor Raymond Garcia ug Liga ng mga Barangay president ug ex-officio city councilor Franklyn Ong nga mangulo sa pagpahawan sa mga istraktura nga nasuta nga nisulod sa sidewalk. —Caecent Noot-Magsumbol (BANAT NEWS)