CCPO gihagit ni Rama sa dali nga pagresponde sa alarma

CEBU, Philippines — Gipatuman ni Cebu City Mayor Michael Rama ang Oplan Run Against Perpetrators (ORAP) diin gihatagan niya ang Cebu City Police Office og tulo ka minutos nga pagresponde sa mahitabong krimen sa siyudad.

Kini ang hagit ni Rama ngadto sa kapolisan atol sa gipahigayon nga press conference diha sa Cebu City Hall kagahapon sa buntag.

Ang maong hagit bukas usab nga gidawat ni Police Colonel Ireneo Dalogdog, direktor sa Cebu City Police Office kinsa niangkon nga adunay pagsaka sa crime incident sa siyudad karong tuiga ug gani aduna sila’y gipatuman nga sestema sa kapolisan.

Kini sama sa Central Beat System sa matag police station diin gipahugtan pa nila ang police visibility ug ang pagpatrolya.

Sa nakalabay’ng mga semana adunay nahitabo nga pagpanulis kinsa ang mga tulisan nagsakay og motorsiklo apan nadakpan usab kini sa kapolisan.

Apil sa tutokan ang nahitabong pagpamusil sama niadtong usa ka babaye nga gipusil patay diha atubangan sa sementeriyo sa Barangay Carreta.

Ang mayor nihatag ug ultimatum nga sa dili pa ang Hunyo 12, 2023 masulbad na ang problema kalabotan sa kahapsay ug kalinaw sa siyudad ug lakip pa usab sa laing mga isyu.

Si Rama nibutyag nga padayon usab siya nga mohatag sa iyahang hugot nga suporta ngadto sa kapolisan gumikan usab sa iyang tinguha nga mahimong Cebu’s Finest.

Nasayran nga ang mayor andam kining mohatag og dugang mga kahimanan sama sa mga motorsiklo ngadto sa mga police station aron dali nga makaresponde kong adunay mga alarma ug kinahanglan usab ang kapolisan magpahigayon og mga sports activities aron mamentinar ang kahimsog sa ilang kalawasan ug dili managko ang tiyan.

Palambuon usab ang mga teknolohiya lakip ang mga close circuit television (CCTV) diin dako kini og tabang sa pagsulbad sa krimen ug labaw sa tanan ang pagsagop unya sa artificial intelligence (AI) subay sa tinguha niini nga mahimong Singapore like Cebu City.  – BDB  (BANATNEWS)