“Baliw-Baliw” Festival gipahigayon sa Isla sa Olango

CEBU, Philippines — Gihugopan sa bagang duot sa katawhan ang San Vicente Ferrer Chapel sa Isla sa Olango sakop sa Dakbayan sa Lapu-Lapu, atol sa pagsaulog sa ilang kapistahan kagahapon.

Gipahigayon ang misa nga gipanguluhan ni Fr. Ciano Ubod, uban sa pipila ka mga kaparian sa Archdiocese of Cebu.

Lakip sa gihugopan sa bagang duot sa katawhan mao ang gipahigayon nga “Baliw-Baliw” Festival diin adunay gihimong fluvial procession ug ang pagsayaw sa niapil sa maong kalihukan.

Sa iyang homiliya, gipadayag ni Fr. Ubod nga mas maayo pilion ang mag antos aron masinati ang tinuod nga kalipay ug gugma kay dili maangkon ang tinuoray nga kalipay ug gugma kung dili kita makasinati ug mga pag antos ug kasakitan.

Gidasig niini ang mga magtutuo nga mas maayo nga mopaambit sa ilang grasya ilabi na ngadto sa mas labing nanginahanglan.

samtang dunay mga residente sa lugar nga tinguha nga undangon ang pagpahigayon sa festival apan daghan usab ang nisupak niini sa pagtuo nga makasinati ug dili maayong panghitabo sa ilang dapit sama sa mga sakit-sakit ug uban pa.

Si Erwin Eyas, usa sa mga nagdumala kanhi sa maong kalihukan nitug-an nga kanunay gayud nilang gipahimangnuan nga atol sa maong kalihukan wala na untay mga kahayupan nga masakitan aron dili sila maigo sa animal welfare act.

Ang maong festival nagpakita sa gihimo sa mga katiguwangan kaniadto nga paghalad sa ilang mga abot o grasya nga naangkon. (BANAT NEWS)