Gustong mokandidato sa brgy elections nakisusi na sa Comelec

CEBU, Philippines — Aduna nay pipila ka mga tawo nga gustong magpapili sa umaabot nga pinilay sa barangay ug Sangguniang Kabataan (SK) sa Dakbayan sa Talisay ang nagpakisusi na sa buhatan sa Commission on Elections sa siyudad sa Talisay.

Kini maoy gibutyag nj Josef Buac, kinsa maoy election assistant sa Commission on Election (COMELEC) sa Talisay kinsa nangandam na usab sa umaabot nga eleksyon karong buwan sa Oktubre ning tuiga.

Ang pagduso sa Certificate of Candidacy (COC) sugdan sa Agusto 28 hangtud na sa Septiyembre 2. Matud pa ni Buac nga pipila ka tawo ang ilang gihatagan og listahan sa mga rekisitos alang sa pagduso og COC.

Gitutokan sab sa buhatan sa comelec ang pagsuta kung wala ba nagdoble ang mga pangalan sa nagparehistro ug pagwagtang na sa mga pangalan sa nangamatay na.

Sa pagkakaron, naa na sa 155 mil ka mga registered voters ang Talisay diin mas taas kini sa miaging piniliay nga naa lang sa 143 mil. (BANAT NEWS)