Kandidata nga nagsul-ob sa vestment sa Sto. Niño gisaway

CEBU, Philippines — Nakaani og lain-laing reaksiyon ang kandidata sa Binibining Pilipinas kinsa nagsul-ob og vestment sa Santo Niño isip national costume.

Si BB Pilipinas No. 34 Joy Dacoron maoy nagsul-ob sa nahisgutang costume diin nagpahulagway kini diha sa mga simbahan sa Sugbo.

Giingong ang pagsul-ob ni Dacoron sa maong costume nagsimbolo kini sa iyahang dakong pagtuo ug paghatag og yukbo sa Santo Niño nga maoy tinubdan sa iyang inspirasyon ug kusog.

Apan ang maong costume nakaani og daghang dili maayo nga reaksiyon.

Adunay nipadayag nga dili kini nindot tan-awon ug susama nga gipasipad-an ang Santo Niño.

Sa iyang bahin, si Labajo nagkanayon nga ang pananghid ni Dacoron ngadto kaniya mao nga magpahulagway kini diin ang background mao ang mga simbahan sa Sugbo.

Matud ni Labajo nga walay siya’y idea nga i-promote diay ang vestment sa Sto. Niño isip national costume ug labaw nga wala makahibaw ang mga kapariang Agustino hinungdan nga diha ra kini sa gawas nagpahulagway ug dili sa sulod sa Basilica.

Si Labajo nagkanayon nga si Dacoron kinsa residente sa Lungsod sa Balamban diha kini niduol nila ni Padre Tata.

Si Dacoron ug ang manager niini mao ang patubagon sa hinungdan nga ang vestment sa Santo Niño ang gipiling national costume.

Ang kaparian sa Agustinian Friars sa Basilica Minore del Santo Niño nagkanayon nga ang pagdeboto sa Santo Niño maoy pinaka-popular nga devotion sa Pilipinas tungod kay expression kini sa katawhan sa ilang pagtuo.

Ang pagpasul-ob ug vestment sa Sto. Niño sa mga kabataan usa sa mga expression sa pagtuo sa ginikanan aron sa pagtabang pagpasabot kanila ug sa pagpalambo usab sa ilang pagtuo ngadto sa Batang Hesus.

Matud usab sa mga Augustinian Friars nga bisan sa kadaghan sa pamaagi sa pagpadayag sa pagtuo ngadto kang Sto. Niño importante usab nga ibutang sa huna-huna ang kaangayan sa mga lihok ug isip Sugbuanon nga katoliko.

Si Fe Mantuhac- Barino, chairman sa Commission on the Laity sa Archdiocese of Cebu nagkanayon nga ang creativity kinahanglan ubanan usab og lamdag gikan sa Espiritu Santo aron mogawas ang tinuod nga beauty of God’s creation diin kinahanglan ang pagrespesto sa kultura ug religion.

Si Fr. Japheth Geonzon, vice chairman sa commission on worship nagkanayon nga  nindot ang intention sa kandidata ug sa nagpaluyo niini apan wala lang mahaom.

“The religious vestment is not intended for pageantry and for anything outside sa iyang context”, ni Geonzon pa.

Dugang ni Geonzon nga adunay daghang pamaagi nga ang kandidata makapakita sa uniqueness sa Sugbo. (BANAT NEWS)