Mibangga sa multicab, patay

CEBU, Philippines — Patay ang drayber sa motorsiklo human gikatahong tuyo niining gibangga ang kasugat niini nga multicab diha sa dalan Juana Osmeña sa Barangay Kamputhaw sa Dakbayan sa Sugbo pasado alas 10, Martes sa buntag.

Ang biktima giila nga si Gleven Karry Garces,30, residente sa Duterte Street sa Sitio Kawayan, Banawa sa Barangay Guadalupe sa Dakbayan sa Sugbo.

Matud ni Derrick Surjedo Trance, ang driver sa multicab nga nakita niyang kusog ang dagan sa motor nga nipadung kaniya kay bisan gisuwayan pa niya og likay naigo gyud ang atubangang bahin sa iyang sakyanan.

Tungod sa kakusog sa impact, napangka ang ulo sa biktima sa windshield sa multicab nga miresulta sa iyang hinanaling kamatayon.

Matud sa hinigugma sa biktima nga si Michelle Baclayon, 26, nakainom kini ug nasuko niya kay wala siya mosakay kay wala siyay helmet bisan gipugos  pa siya niini.

Giangkon ni Baclayon  nga nag-away sila samtang nagdagan ang motor tungod kay wala silay helmet hangtud nga mipugos siya pagkanaog.

Sa dihang iyang giingnan nga papaulion nalang kini, miligid naman hinuon sa karsada ug mosugat na sa mga sakyanan nga nag dagan.

“Gikan palang sa amo init na iyang ulo sige ko hangyo nga dili ko pahatud kay walay helmet ug nakainom, abi nako sa eskina ko niya ihatud nidiretso man hangtud naabot mi sa Vacation Hotel ninaog ko nihigda man siya diha (kalsada),” sigon ni Baclayon.

Dugang pa ni Baclayon human kini niya giingnan nga papaulion nalang, nibalik kini sa motor ug mipabulhot ug gibangga sa gikasugat nga multicab.

“Gituyo man dako kaayo hawan,” sigon ni Baclayon .

Ang uyab nagtuo nga naghikog kini tungod kay kanunay niini hisgutan nga gikapoy na siya sa iyang kinabuhi.

Sa pikas bahin, mas daghan vehicular accidents ang natala sa City of Talisay Traffic Operations and Development Authority sa unang quarter sa 2023 kung ikomparar sa nilabay nga mga tuig.

Ang pangulo sa CTTODA Jonathan Tumulak miingon nga nisaka ang gidaghanon sa insidente sa 1st quarter karon tuiga ug naalarma sila niini tungod kay mo average na kini og 200 aksidente kada buwan.

Sumala pa ni Tumulak, sa buwan sa Enero nakatala sila ug 210, Feb-205, ug March-224 ka aksidente.

Kasagaran sa naaksidente nahitabo gikan sa buntag ngadto sa ala-una sa hapon , 40 porsiyento niini naglambigit og motor.

Si Tumulak, padayon niawhag sa mga biyahedor nga tumanon lang gayud kung unsay nalatid sa balaod aron paglikay nila sa disgrasya ug aron dili usab sila makamulta. — IBM (BANATNEWS)