Kapin sa P1 milyon shabu nasakmit gikan sa tulo ka durugista
CEBU, Philippines — Usa ka kargador sa pier sa Dakbayan sa Sugbo ang nadakpan atol sa buy bust operation sa kapolisan sa Dakbayan sa Lapu-Lapu diha sa Barangay Poblacion sa nilabay’ng adlaw.
Ang suspetsado mao si Ryan Dagwayon, 42-anyos, taga Barangay San Roque, Dakbayan sa Sugbo.
Nangulo sa maong operasyon si Police Colonel Elmer Lim, direktor sa LLCPO.
Nasakmit gikan sa suspetsado ang usa ka kilo nga shabu nga nibalor tanan ngadto sa kapin sa P6 milyones base sa Street Drug Price Value. Base sa imbestigasyon sa kapolisan ang suspetsado giingong ang area of distribution niini mao ang Dakbayan sa Lapu-Lapu, Mandaue ug Cebu City.
Nasayran usab sa kapolisan ang tinubdan sa ginadili nga drugas ni Dagwayon.
Sa laing bahin, nasakmit ang napulo ka gramo nga shabu nga nikantidad tanan ngadto sa P70,000 gikan sa managsuon nga pusher nga nadakpan atol usab sa buy bust operation sa kapolisan sa Presinto 3 sa Mandaue City Police Office (MCPO) diha sa Barangay Pagsabungan sa niaging gabii.
Si Police Captain Emmanuel Rabaya, hepe sa kapolisan sa Presinto 3 sa Mandaue City Police Office (MCPO) niila sa ilang nadakpan nga si Alteo Navarro, 23-anyos ug manghud niini nga si Darrel, 21, parehong nagpuyo sa Dakbayan sa Dakbayan sa Sugbo.
Matud ni Rabaya nga nakakuha sila og contact sa magsuon nga ilang gihulagway high value individual.
Gibutyag ni Rabaya nga natigayon ang buy bust operation pinaagi sa ilang police decoy nga nagpatuo nga kostumer niini.
Dugang ni Rabaya nga ang duh aka suspetsado ang nagtingkagol karon sa ilang detention cell ug kasong kalapasan sa Akta Republika 9165 kun “Comprehensive Dangerous Drug Act of 2002” ang gikatakdang ipasaka batok sa mga suspetsado. - Romeo T. Limpangog, BDB (BANATNEWS)
- Latest