Dalan sa Barangay San Isidro isirado karong Sabado
CEBU, Philippines — Ang City of Talisay Traffic Operations and Development Authority (CT-TODA) niawhag sa mga biyahedor nga planohon na nila daan ang ilang mga biyahe karong adlaw nga Sabado tungod kay adunay ipahigayon nga road closure sa Barangay San Isidro gikan sa alas 12:00 sa udto ngadto sa alas 2:00 sa hapon tungod sa ipahigayon nga street dancing subay sa kapistahan sa patron sa barangay San Isidro Labrador.
Ang CTTODA nipahibalo nga ang sayaw manukad sa eskina sa Cebu South Coastal Road ug mopadulong kini sa Barangay Sports Complex atbang sa barangay hall sa San Isidro.
Ang mga traysikol nga pasaheroan adto moagi sa eskina Dumlog lapos sa dalan F. Bas sa Barangay Mohon ug moliko ngadto sa Deiparine Street sa Sition Kalmar ug mogawas ngadto sa Mananga paingon sa Barangay Tabunok hangtud nga mobalik sila sa ilang mga rota.
Adunay mga traffic Enforcer ang ipakatap sa dapit aron makagiya sa mga dalan nga ilang mahimong masudlan padulong sa ilang mga tagsa-tagsa ka padulngan.
Ang CTTODA niawhag ngadto sa mga adunay mga lakaw sa maong mga adlaw nga mohimo na og mga plano ug patas-an usab ang ilang pasensiya. – (BANATNEWS)
- Latest
