DepEd Mandaue padayong nangandam sa SK ug brgy elections

CEBU, Philippines —  Nagtinabangay karon ang Department of Education (DepEd) sa Mandaue City Division ug ang Commission on Election (COMELEC) sa maong dakbayan sa ilang pagpangandam alang sa umaabot nga barangay ug Sangguniang Kabataan election.

Suma pa ni Atty Marinel Oro, tigpamaba sa DepEd Mandaue nga lakip sa ilang gihan-ay mao ang kabahin sa pag-umol og moserbisyo isip sakop sa electoral board nga kuhaon gikan sa mga magtutudlo.

Apan gitataw ni Oro nga kadtong mga magtutudlo nga adunay direktang relasyon o sakop sa pamilya nga mokandidato ang dili mahimong moserbisyo sa piniliay.

Malaumon si Oro nga nasayod na ang mga magtutudlo sa maong lagda sa comelec ug siya malaumon nga motuman sila niini. 

Ang commission on elections nakig-alayon na sa mga tunghaan sa siyudad aron pagkuha sa listahan sa mga magtutudlo nga nagtinguha sa pagserbisyo isip electoral board members.

Gisuroy na usab sa comelec ang mga tunghaan nga gamiton isip polling centers.

Ang barangay ug SK elections ang gikatakda na nga pagahimoon sa Oktubre 30 niining tuiga ug ang election period magsugod karong Hulyo 3, 2023. -  MEL (BANATNEWS)