LTO motanyag sa ilang serbisyo sa probinsiya sa Bohol
CEBU, Philippines — Gipabawo ni Bohol Governor Erico Aristotle Aumentado nga mapahigayon na sa ilang dapit ang usa ka caravan sa Land Transportation Office LTO nga motanyag sa ilang nag-unang serbisyo.
Una niini ang local nga kagamhanan mihangyo sa kadagkuan sa LTO sa pagpahigayon sa caravan atol sa ilang tigum uban sa mga opisyales sa Land Transportation Office Tagbilaran City District Office nga gipangulohan ni LTO-Tagbilaran Head Yvonne Auza ug Releasing Officer Rechie Prime.
Lakip sa mga serbisyo nga itanyag sa LTO-7 mao ang pagpangrehistro, ug renewal sa mga motor vehicle ug lakip ang driver’s license ngadto sa mga kalungsoran aron matubag ang yangongo sa katawhan bahin niini.
Suma pa ni governor Aumentado nga nahisgutan usab nila ang mga lakang nga angayan buhaton batok sa mga kolurom nga pampublikong sakyanan diha sa ilang probinsya sa Bohol.
Samtang si LTO 7 Regional Director Victor Emmanuel Caindec mitug-an nga nakighinabi na siya sa gobernador kabahin sa ilang itanyag nga Theoretical Driving Course ug E-Patrol Program nga ilusad sa probinsya.
Sumala pa ni Caindec, ang LTO-7 andam sa maong proyekto ug nagpadayon na ang preparasyon alang sa paglusad na niini, diin ipahibalo ra nila ang tukma nga petsa alang niini uban sa gobernador. —/MEL (BANAT NEWS)
- Latest
