Mga atleta ug coaches nga misalmot sa CVRAA gipasidunggan

CEBU, Philippines —  Gipasidunggan sa kagamhanan sa Dakbayan sa Talisay ug sa Department of Education (DEPED) ang tanang atleta, coaches ug mga magtutudlo nga nisalmot sa Central Visayas Regional Athletic Association (CVIRAA) kagahapon.

Bisan paman og layo ra ang standing sa Talisay sa pinakadaghang medalya nga nasakmit gihatagan gihapon og pasidungog ang mga naghago sa kalihukan.

Si Dr. Marcelita Dignos, assistant school division superintendent nagkanayon nga ilang nakita ang kahago sa mga batang atleta ingon man ang mga coaches ug gitapos nila ang kalihukan nga walay mga kakulian.

Si Dignos nitataw nga sa mosunod nga palaro sila maningkamot pa sa pagtabang sa mga atleta ug sa tibuok delagasyon sa Talisay.

Ang kagamhanan sa siyudad sa Talisay pinangulohan ni mayor Gerald Anthony “Samsam” Gullas ang mitambong sa kalihukan.

Ang Talisay nakakuha og usa ka gold medal, lima ang silver ug walo ka bronze nga medalya.

Si bise mayor Richard Francis “Choy” Aznar nagpasalamat sa tanang naghago ilabi na sa mga atleta ug coaches nga bisan paman sa kainit sa panahon nagpadayon sa pagbansay.

Gipasalig ni Aznar nga andam sila sa pagsuporta kanunay sa mga atleta sa mosunod nga kalihukan sa paugnat sa kusog. — MEL (BANATNEWS)