Ginang, kabit sakpan sud sa motel

CEBU, Philippines — Gibalhog sa prisohan ang usa ka kanhi Overseas Filipino Worker (OFW) ug ang minyo niya nga karelasyon human silang duha gikatahong nasakpan nga nagkumbati sa kama sa usa ka motel sa Barangay Biasong, Dakbayan sa Talisay niadtong Miyerkules sa alas 11:50 sa gabii.

Ang kanhi OFW nagpangidaron og 37 anyos samtang ang iyang uyab nga ginang  nga minyo nagpangidaron og 35 anyos. Ang duha managsilingan ra sa Barangay Poblacion sa nahisgutang siyudad.

Si Police Lt. Col. Randy Caballes, hepe sa kapolisan nibutyag nga daan ng nagduda ang bana nga dunay relasyon ang asawa niini ug ilang silingan.

Nianang gabhiuna, gikatahong nakit-an niini ang asawa nga miangkas sa motor sa maong lalaki hinungdan nga nagpatabang ang 37-anyos nga bana ngadto sa iyang mga kauban sa gitrabahoang shop. Sa ilang pagsunod-sunod, nanulod ang duha sa usa ka motel sa Barangay Biasong.

Pagabot didto, nihangyo ang bana sa management sa motel nga sila pasudlon ug adtuon ang lawak diin mi-check in iyang asawa kauban ang kanhi OFW.

Ug didto gikatahong nasakpan ang duha nga pulos hubo na sa ilang mga sapot hinungdan nga ilaha kining gidakop ug gi-turnover ngadto sa kapolisan sa Dakbayan sa Talisay. Ang bana gikatakdang mopasaka og kaso batok sa duha.— (BANATNEWS)