Dugang satellite market gitinguha sa Cebu City

CEBU, Philippines — Usa sa mga plano sa bag-ong operation head sa Cebu City Market Operations Division (MOD) Engineer Robert Llamado Barquilla mao ang pagdugang og mga satellite market diha sa kabaranggayan.

Usa kini sa pamaagi aron mas maduol og samot ang katawhan sa mga baratong palitonon.

Matud ni Barquilla nga sa pagkakaron adunay napulo lang ka satellite market ang siyudad ug angayan kini nga dugangan ug ibalik usab ang mga tabo. Tumong sa pagdugang sa mga satellite market mao nga daghan ang maplastadahan sa mga produkto sa ang-uuma gikan sa kabukiran ug sa maong sitwasyon mahingosgan ang panginabuhian sa mga mag-uuma.

Nagkanayon si Barquilla nga usa usab sa direktiba ni Mayor Michael Rama kaniya nga kinahanglang ma-monitor og maayo ang mga presyo sa mga baligya diin kinahanglang mamentinar ang makataronganon nga presyo sa mga gibaligay diha sa kamerkadohan.

Matud usab ni Barquilla nga bisan aduna siya’y posisyon sa MOD magpadayon gihapon ang iyang paghupot sa karaan niya nga katungdanan sa Human Settlement Administration.

Usa usab sa mga tutokan niya mao ang kalimpiyo sa mga merkado ilabi na nga subay usab kini sa tinguha sa Dakbayan sa Sugbo nga masusama kini sa Singapore  (BANATNEWS)