Teves mahadlok mouli sa Pilipinas tungod sa hulga sa kinabuhi

CEBU, Philippines — Si Negros Oriental Representative Arnolfo “Arnie” Teves nipagawas na usab og bag-ong video sa iyang social media page ug nipadayag nga dili kini mouli tungod sa hulga sa iyang kinabuhi bisan pa sa awhag ni Speaker Martin Romualdez.

Matud ni Teves nga nagtinguha siya nga moapil sa ilang tigom sa Kongreso pinaagi sa online diha sa zoom apan wala siya tugoti sa komitiba hinungdan nga nasagmuyo siya.

Si Teves nangangkon nga nasayod siya sa ka seryoso sa hulga sa iyang kinabuhi ug dili niya mahatagan og katumanan ang hangyo ni Romualdez nga mouli siya sa Pilipinas.

Si Teves sa iyang panawagan kang Presidente Ferdinand “Bongbong” Marcos, Jr. nipasangil kini nga adunay mga tawo sa gobiyerno nga niduot kaniya.

Giawhag usab ni Teves nga susihon ang attendance sa mga kongresista kong kinsa ang adunay daghan og absent.

Sa iyang video nga nilanat og 18 ka minutos nipadayag og kabalaka sa iyang kinabuhi si Teves tungod kay bisan si kanhi Negros Oriental Governor Roel Degamo nga giingong adunay mga bodyguard ang gipatay diha sulod sa panimalay niini.

Si Teves gilambigit kini sa pagpatay kang Degamo apan ang maong pasangil giimakak sa kongresista.

Ang kongresista atoa karon sa gawas sa nasud alang sa pagpatambal ug gikatakda unta kini nga mobalik sa Pilipinas niadtong Marso 9, 2023 apan hangtud karon wala pa kini mopatim-aw tungod sa kahadlok sa iyang kinabuhi.

Si Marcos niawhag kang Teves nga mobalik sa nasud diin ang pwede kining mosakay sa iyang private jet nga motugpa sa Basa Air Base ug palibotan kini sa mga sundalo aron makaduol niini sulod sa usa ka metro.

Dugang ni Marcos nga samtang nagkadugay mas nagkalisod ang sitwasyon ni Teves. (BANATNEWS)