Triple A ang gipangayo sa bag-ong PRO-7 director sa mga sakop
CEBU, Philippines — Bag-ong milingkod nga direktor sa Police Regional Office-7 Brigadier General Anthony Aberin mopatuman og AAA program sa tanang mga sakop.
Si Aberin pormal nga milingkod sa katungdanan kagahapon human sa turnover of office nga gipahigayon sa PRO-7 Headquarters, Camp Sergio Osmeña Sr., Siyudad sa Sugbo.
Ana AAA program ni Aberin mao ang Able, Active, ug Allied. Pasabot sa Able nga ang kapulisan dunay skills ug resources aron mabuhat og sakto ang trabaho pinaagi sa pag-invest sa mga personnel, pagpaubos kanila sa trainings ug suportahan sa mga panginahanglanon, mogamit sab og the teknolohiya aron paspas ang lihok ug mahimong epektibo.
Sa pagka Active, kanunay nga naglihok, naghimo og mga programa aron mapakgang ang krimen ug mapalambo ang crime solution efficiency.
Mamahimo silang proactive ug mopahigayon og agresibong kampanya batok sa tanang matang sa kriminalidad apil niini ang pagpuhag sa E-Sabong tungod kay siya ang nangulo sa SITG Sabongero nga nagimbestigar sa na-missing nga 30 ka sabungero sa kaulohan.
Ang Allied mao ang paghatag og importansiya sa partnership ug collaboration sa ubang ahensiya sa gobyerno, stakeholders ug uban pang grupo.
Si Aberin maoy hulip ni Police Brigadier General Jerry Bearis nga kinsa duha ka buwan ug 25 ka adlaw ra sa pwesto. Hinuon, ubos sa pamunoan niini mikunhod ang krimen ug misaka ang crime solution efficiency sa kapolisan.
Si Bearis mao nay bag-ong director sa Aviation Security Group Philippine National Police, ang relieve order nigawas pila ka semana human sa nahitabong masaker sa Pamplona, Negros Oriental diin siyam ang nakalas apil na si Governor Roel Degamo.— IBM (BANATNEWS)
- Latest
