Presyo sa lechon sa Talisay mosaka
CEBU, Philippines — Giangkon sa mga nagnegosyo og lechon sa Dakbayan sa Talisay nga ila na gyud nasinati ang kalisud sa pagpangita og baboy karon gumikan sa pag- igo sa African Swine Fever (ASF).
Si Francisco Orongan, usa ka lechonero nitataw nga daghan nga rekisitos ang gikinahanglan sa baboy nga ibiyahe o ihawon.
Gumikan niini mosaka na ang presyo ug ang kanihit sab sa baboy maoy makapasamot niini. Nahibaw-an nga kasagaran sa lechonero sa Talisay didto sa Negros magkumprahan og baboy.
Apan ang baboy sa Negros gi-ban una dinhi sa probinsya sa Sugbo tungod sa pagkadiskubre sa ASF gikan sa blood sample sa baboy nga giihaw sa ihawan sa Dakbayan sa Carcar.
Matud pa ni Orongan nga ang presyo sa litson niadtong buwan sa Disyembre mao na gyud ang ilaha karong presyo ug siya nabalaka nga mosobra pa kini sa umaabot nga mga adlaw. Iyang gihangyo ang mga kustomer nga unta mosabot lang sab kanila kay wala man pud silay mahimo tungod sa estrikto nga pagbiyahe ug pag ihaw sa baboy.
Si Engr. Ben Agustin, Officer-In-Charge (OIC) sa Talisay City Livestock and Poultry Center miingon nga ilaha ng naobserbahan ang pagnihit sa mga nagpaihaw og baboy sukad nigawas ang balita bahin sa ASF didto sa Dakbayan sa Carcar.
Sukad nibuto ang balita, 64 lang ka baboy ang gipaihaw niadtong Huwebes sa gabii. Sa normal nga mga adlaw sa wala pa kining ASF sa Sugbu, makaihaw sila og sobra usa ka gatus ka baboy.
Si Mayor Gerald Anthony “Samsam” Gullas nagkanayon nga ilang gituman ang Executive Order ni Governor Gwendolyn Garcia ug sa national nga kamanduan.
Nagbutang sila og upat ka checkpoints sa boundary diha sa Sitio Cabutoy, Barangay Mohon, Linao ug sa Manipis. Nagtuo si Gullas nga maapektahan gyud ang presyo sa karne niini.
Hinuon padayon ang ilang pakigalayon ngadto sa mga nagnegosyo og lechon ug mamaligya og karne sa merkado.
Ang kapolisan sa dakbayan sa Carcar ingon man Provincial Veterinary Office nagpadayon sa ilang pagpangita sa uban pang mga baboyan sa maong dakbayan aron mahunong na ang pagkuyanap sa maong ASF. (BANAT NEWS)
- Latest