Scammers nga online sellers pakasohan

CEBU, Philippines — Gitinguha sa konseho sa Dakbayan sa Talisay nga mosilot sa mga tawo nga mamaligya diha sa online nga di mao ang i deliver ngadto sa kustomer. Si Konsehal Lito Bacaltos nagkanayon nga daghan na ang iyang nahibaw-an nga nabiktima niini ug wala nay mahimo kay nakalakaw naman ang rider.

Gani siya mismo nisuway niini diin ni order siya og relo nga nindot tan-awon sa hulagway apan sa pag-deliver nahisusama kini og duwaan.

Si Bacaltos nihimo og ordinansa sa pagbutang sa katungod sa buyer nga kung mahimo ablihan diretso ang gi order samtang dili pa makabiya ang rider.

Asoy pa niya nga kung pananglit dili mao ang gihatud mahimo nga iuli kini sa buyer.

Ang ordinansa ni Bacaltos nakapasar na sa unang pagbasa diin naglatid sab sa silot unya sa mga mamaligya sa online nga scammer.

“Daghan na gyud ang nabiktima ani pero wala na silay mahimo unsaon pag gukod sa seller nga mangingilad,” nagkanayon si Bacaltos.

Gikatakda nga magpahigayon unya og public hearing sila si Bacaltos labot na sa mga silot nga ilang ipahamtang sa mga scammer. (BANATNEWS)