Polis napatay ang uyoang kanhi polis
CEBU, Philippines — Bugno sa mga iro nahimong hinungdan sa mainiton nga panaglalis tali sa managuyoang usa ka polis ug kanhi polis nga misangpot hinuon sa pagpamusil nga gikamatay sa usa diha sa Sitio Cruzan, Barangay Bulacao, Dakbayan sa Talisay niadtong Miyerkules sa gabii.
Ang biktima mao si Franklin Bolaquia, 45, kinsa kanhi polis nga nagpuyo sa nahisgutang lugar.
Samtang ang suspek mao ang iyaha rang pag-umangkon nga si Patrolman Don Rusti Pelayo, traffic investigator sa Mandaue City Police Office.
Si Police Corporal Eleazar Belciña, imbestigador sa Talisay City Police nagkanayon nga ang biktima na-dismiss sa serbisyo gumikan sa kaso nga murder niadtong 2016. Matud pa niya nga sa pag-abot sa biktima sa ilang panimay naabtan niini ang mga iro nga nagbugno. Gibadlong sa biktima ang mga iro apan usa ka Isaias Dela Peña kinsa giingong usa sa mga tag-iya sa iro nga nagbugno nakalalis na hinuon sa biktima. Si Bolaquia gikatahong napungot ug mikuha og bara de kabra ug gibunal sa pultahan sa balay ni Dela Peña.
Ang kasaba sa duha nakaaghat kang Pelayo nga mogawas sa ilang panimay aron buwagon ang duha.
Matud pa nga sa pag-uwang ni Pelayo misulod si Bolaquia sa balay niini ug dihang nigawas nagbitbit na kini og armas.Si Pelayo pagkakita sa iyang uyoan nga nagtion kaniya sa gidalang armas dali sab nga nakabunot sa iyang armas ug pusil kini.
Nakabsan gyud sa kinabuhi ang biktima samtang ang suspek mitahan sa iyang kaugalingon sa kapolisan. Ang TCPS padayon pa karong naghimo og imbestigasyon kabahin sa maong hitabo. (BANATNEWS)
- Latest
