TCPS: Mga gangs ug dili fraternities ang badlungon sa Talisay City

CEBU, Philippines — Mga fraternities sa Siyudad sa Talisay wa magpabadlong sumala pa sa Talisay Police apan ang gangs sa mga batan-on  maoy ilang gibantayan karon tungod sa mga krimen ug kasamok nga ilang gibuhat sa nanglabay nga mga adlaw.

Sumala pa sa hepe sa kapolisan sa siyudad, ni Police Lt. Col. Randy Caballes, maayo nga koordinasyon sa ilang mga programa nga ikaayo sa kadaghanan kauban ang mga nagkalain-laing fraternities nga ilang siyudad.

Kani lang gyung mga pagsiaw sa mga gagmay nga mga gangs sa mga batan-on maoy naghatag og problema tungod kay gamay lang bikil karambola dayon.

Matud pa ni Caballes nga na arang-arang lang kini karon kay sa ilang gihimo nga diversion program namenos ang panghitabo nga kahubot sa mga batan-on.

Nahimo kini human nga mismo na ang mga barangay officials ang mitabang pagtumbok kun kinsa ning mga lider sa mga gangs nga ilahang gipatawag ug gi gipaubos og seminars.

Si Caballes niangkon nga kung maghisgot og fraternity nakatabang sila sa mga programa sa kapolisan ug wala say natalang kagubot nga naglambigit og mga fraternities sa Talisay.

Kabahin sa hazing, si Caballes nanawagan nga subay sa balaod gidili gyud ang hazing busa angay gyud kini likayan.

Ang Alpha Sigma Omega International Collegiate Service Fraternity and Sorority sa Talisay City usa sa mga fraternities nga nitahan kaniadto sa ilang mga paddles pagpamatuod nga nisanong sila sa Anti-Hazing Law.— /IBM (BANAT NEWS)