Luna sa PC Hills ug TESDA bawion na sa Kapitolyo

CEBU, Philippines — Bawion sa Kapitolyo ang mga luna nga giokupar karon sa Technical Education and Skills Development Authority sa may Salinas Drive, ug sa Philippine National Police sa Apas o mas naila nga PC Hills, Dakbayan sa Sugbo.

Ang hunta probinsiyal atol sa sesyon kagahapon nibawi sa donasyon sa maong mga luna ug nihatag og katungod kang Gob. Gwendolyn Garcia sa paghimo sa tukmang lakang sama sa pagsang-at og kaso aron mabawi ang maong mga luna.

Si Bokal Glenn Anthony Soco ang nangamahan sa duha ka resolusyon sanglit wala nakatungha sa sesyon si Bokal John Ismael Borgonia nga maoy niduso sa resolusyon isip tsirman sa committee on provincial and municipal properties sa hunta probinsiyal.

Niadtong Pebrero 16, 1973, si gobernador Osmundo G. Rama ang nilagda sa donasyon sa Lot No. 915 sa Banilad Estate ngadto sa National Manpower and Youth Council (NMYC) sa may Salinas Drive, Dakbayan sa Sugbo.

Apan ang NMYC gipapas dihang gimugna ang Technical Education and Skills Development Authority pinasikad sa Republic Act No. 7796.

Samtang ang Kapitolyo nidonar usab sa Lot 1157 ug katunga nga bahin sa Lot 1158 sa Banilad Estate nga nahimutang sa Apas, Dakbayan sa Sugbo ngadto sa Third Philippine Constabulary (PC) Zone niadtong Septiyembre 15, 1959 sa panahon ni gobernador Jose L. Briones.

Apan ang PC gipapas usab pinasikad sa Republic Act No. 6975 nga nagmugna sa Philippine National Police ubos sa Department of the Interior and Local Government.

Matud ni Borgonia nga ang pagpapas sa NMYC ug PC kalapasan sa nalatid nga kondisyon sa deed of donation diin nag-ingon nga kung wala na ang maong mga ahensiya, ibalik ang luna ngadto sa kagamhanan sa Lalawigan sa Sugbo.

Sumala pa ni Borgonia nga ang luna sa Third PC Zone wala na gamita isip headquarters ug barracks sa kapolisan apan gihimo na hinoon kining Officers Quarters sa PNP Regional Office 7 nga laing kalapasan sa deed of donation.

Ang hunta probinsiyal niadtong Nobiyembre 22, 1993 nihatag na og katungod kang gobernador Vicente L. Dela Serna sa pagbawi sa maong luna nga karon gigamit sa PNP. (BANATNEWS)