Buwangan sa Minglanilla gironda, 27 gidakop

CEBU, Philippines — Miabot sa 200 ka sugarol ang gi-hold sa mga sakop sa Minglanilla Police sa ilang pagronda sa Amenic Cockpit Arena sa Barangay Calajoan, lungsod sa Minglanilla niadtong Sabado sa hapon.

Apan 27 lang niini nga nailhan nga maoy nagdumala sa buwangan nga ila sab gidakop. Ang kapolisan padayon ang ilang paghingusog sa kampanya batok ilegal nga sugal ilabi na sa e-sabong.

Ang kapolisan sa Minglanilla nakadawat og reklamo batok sa maong buwangan  nga kini nag-operate niadtong Biyernes sa miaging semana bisan og walay special permit.

Sa pagsusi sa kapolisan sa lugar, nakita nga naay mga monitor ang buwangan nga nagtuman sa IATF guidelines.

Niadtong Sabado sa hapon, gihimo nila ang operasyon ni Police Major Arieza Otida, hepe sa kapolisan sa Minglanilla uban sa taga PIU, RID 7, ug 2nd PMFC.

Si Otida nagkanayon nga sa ilang pag-abot ang nagdumala sa buwangan pakyas sa pagpakita nila og permit gikan sa lokal nga kagamhanan aron sa pagpahigayon og 5-cock derby nga klaro nga nakalapas sa section 7 sa PD 449.

Pakyas sab sila sa pagpakita og permit sa lokal nga kagamhanan nga adunay pagtugot sa hepe sa kapolisan.

Nakuha nga ebidensya sa pagpangronda mao ang kwarta nga nikantidad og P150 mil  nga pusta, computer sets, printing machine, scales, laptop, mga dokumento ug 200 ka mga igtatari nga manok nga adunay nagkalain-laing kolor.

Matud pa ni Otida nga ang 27 maoy arestado samtang ang uban gikuhaan lang og profiles. (BANATNEWS)