Way ebidensiya bahin sa manananggal-polis

CEBU, Philippines — Nanawagan ang kapolisan sa Dakbayan sa Talisay ngadto sa Talisaynon nga pabilin nga kalma labot sa nikatap nga estorya nga nakit-ang “manananggal” sa duha ka babaye nga menor de edad.

Si Police Lt. Col. Randy Caballes, hepe sa kapolisan nibutyag nga ila kining naalarmahan niadtong Martes sa gabii diin ang mga tawo nabulabog gumikan sa kalisang sa mga bata sa sitio Mangga, Barangay Dumlog.

Asoy pa ni Caballes nga padayon pa ang ilang imbestigasyon apan sa pagkakaron, wala pa silay nakuha nga ebidensya labot sa presensya sa “manananggal.”

Nihangyo sab sila ngadto sa mga tawo nga dili magpataka og pakatap og dili beripikado nga impormasyon nga makapaalarma sa katawhan.

Dugang pa ni Caballes nga sila sa kapolisan sama sa kadaghanan naningkamot aron matagaan og katin-awan ang panghitabo.

Gihulagway ni Mayor Gerald Anthony “Samsam” Gullas ang sirado na ang kaso sa “manananggal” ug mas maayong tagaan og pagtagad ang mga bata nga nalisang samtang wala pa mabalik ang ilang klase.

Iya lang mensahe sa Talisaynon nga mag ampo ug pabilin gihapon nga magbinantayon dili lang sa mga “ingon nato” kondili hasta sa mga dautang elemento. (BANATNEWS)