255 ka polis negatibo sa drug test; kanhi durogista gihimong drug advocates

CEBU, Philippines — Negatibo sa gpahigayong random drug test sa Provincial Intelligence Unit pinaagi sa pakig-alayon sa Cebu Provincial Forensic Unit ang 255 ka police personnel sa Cebu Police Provincial Office (CPPO).

Nasayran nga niadtong Pebrero 7, 2023 gipaubos sa random drug testing ang 150 ka police personnel sa CPPO diin ang 150 gilangkuban kini sa 40 ka police sa Minglanilla Police Station, 73 ka personnel sa Naga City Police Station ug 37 ka personnel sa San Fernando Police Station.

Sa pagsugod sa tuig 2013 ang CPPO nakapahigayon na og tulo ka random drug test diin ang ikatulong drug test gipahigayon niadtong Martes.

Ang unang drug test gipahigayon dihang nag-command conference ang CPPO kinsa ang mga chief of police ug provincial staff ang gipaubos sa random drug test.

Gisundan kini niadtong Pebrero 1, 2023 diin 150 ka polis gikan sa Compostela Police Station, Liloan Police Station ug Consolacion Police Station ang gipaubos sa drug test diin ang tanan negatibo ang resulta.

Sayo pa, si Police Colonel Rommeo Ochave, direktor sa CPPO nagkanayon nga ang pagpaubos sa random drug test sa kapolisan sa Probinsiya sa Sugbo kabahin kini sa internal cleansing program sa Philippine National Police aron madisplina ang kapolisan ug masiguro nga walay nalambigit sa ilegal drugas.

Gipahimangnoan ni Ochave ang tanang personnel niini nga pahamtangan og bug-at nga silot ang mga magpositibo sa random drug test.

Sa laing bahin, moabot ngadto sa 600 ka kanhi tiggamitan og ilegal nga drugas ang gibansay sa Police Regional Office-7 aron mahimong Anti-illegal Drug Advocates (AIDA).

Matud ni Police Lieutenant Colonel Gerard Ace Pelare, tigpamaba ni Brigadier General Jerry Bearis, direktor sa PRO-7 nga ang maong drug advocates motabang sa tanang kalihokan sa kapolisan aron batokan ang ilegal nga drugas.

Ang maong drug advocates motabang sa pag-edukar sa katawhan sa dili maayong epekto sa drugas, moapil usab sila sa mga symposium, patrolling sa kapolisan apan adunay limitasyon ang ilahang partisipasyon.

Aron usab nga masiguro nga ang maong drug advocates dili na mobalik og gamit og ginadiling drugas tabangan sila sa Department of Social Welfare and Development ingon man sa Local Government Units.

Ang paghimo sa mga kanhi tiggamitan og ilegal nga drugas isip drug advocates programa kini ni Bearis diin ilusad kini karong Pebrero 19, 2023 atol sa ilahang BIDA roll out nga ipahigayon diha sa Cebu City Sports Center. (BANATNEWS)