Tawong gidudahang maoy nanghilo sa mga iro sa Naga, nakuha sa CCTV

CEBU, Philippines — Aduna nay kopya sa CCTV footage ang kapolisan sa Siyudad sa Naga labot sa giingong tawo nga maoy nanghilo sa mga iro sud sa usa ka subdivision sa Barangay Inuboran, Dakbayan sa Naga sa nakalabay nga semana.

Si Police Lt. Col. Junnel Caadlawon, hepe sa kapolisan nitataw nga nakita sa footage nga adunay tawo nga mipakaon og pinutos sa mga iro.

Apan wala lang una gipakita sa kapolisan ang footage ngadto sa publiko aron dili maapektahan ang dagan sa ilang imbistigasyon.

Ang kapolisan nihimo sa clean-up drive sa mga namatay nga iro diin 30 kapin ug kulang na ka iro ang namatay. Ang pagpakaon sa tawo nga nakita sa video gihimo diha gyud sulod sa sibdivision. Hinuon ila pa kining klarohon kung aduna bay hilo ang gipakaon niini. Gisuwayan sa pagsulod sa subdivision sa mga tigbalita apan nagdumili sila sa pagpasulod kay ang tinugyanan nga moatubang sa media wala diha. Ang mga nagpuyo gawas sa subdivision nihulagway nga dosena ka iro ang magsulod gawas sa subdivision kaniadto apan karon naa nalang sa duha. (BANATNEWS)