Internet cafés sa Minglanilla buot ipa-regulate sa kapolisan

MANILA, Philippines — Kung ang hepe sa kapolisan sa lungsod sa Minglanilla maoy pabut-on, iyang pasirhan ang mga internet cafe nga mopasulod og menor de edad bisan og lawom na ang kagabhion.

Kini maoy gibutyag ni Police Major Arieza Otida, hepe sa kapolisan bahin sa pagpangusog sa kampanya sa kapolisan sa lungsod batok mga krimen ug pagpanalipod sa mga kabataan sa lugar.

Si Otida miingon nga iya kining ipaabot  ngadto sa konseho sa Minglanilla aron mahimoan og lagda nga pagasundon o ordinansa. Niadtong miaging gabii miabot sa 63 ka mga batan-on ang ilang na-rescue sa lawom na nga gabii ug kasagaran nila gikan sa mga internet cafe nagduwa o nag estambay.

Matud pa ni Otida nga kung pasagdan ang mga ingon niini nga mga kalihukan makaluluoy ang mga batan-on nga posibleng mahitumpawak sa nagkalain-laing krimen.

Asoy pa ni Otida nga nakatabang man tuod sa negusyo apan dili sab maayo nga mabutang sa kalaotan ang kabataan.

Siya nirekomendar na sa konseho sa lungsod nga i regulate ang oras sa mga internet cafe sa lungsod. (BANAT NEWS)