300 ka MRBs gitinguha sa Cebu City nga masugdan dayon
CEBU, Philippines — Gitinguha sa kagamhanan sa Dakbayan sa Sugbo nga masugdan dayon ang pagtukod sa 300 ka medium rise buildings (MRBs)diin 4,000 ka pamilya ang makapahimulos niini.
Matud ni Atty. Jerone Castillo, special assistant ni Mayor Michael Rama nga nahuman na sila sa pag-ila sa mga apektado sa gipatuman nga three meters easement diha sa walo ka sapa sa siyudad.
Gibutyag ni Castillo nga 4,000 ka pamilya ang papahawon gikan sa kasamtangan nila nga giistaran gumikan sa kalapasan sa balaod.
Nagkanayon si Castillo nga padayon ang siyudad sa pakig-alayon sa Pagibig Fund ug sa Department of Human Settlements and Urban Development alang sa pagpahimutang sa mga maapektohan sa pagpaguba sa ilang pinuy-anan.
Ang gikatahong 300 ka MRBs ipahimutang dih duol sa baybayon sa Barangay Duljo Fatima ngadto na sa Barangay Mambaling.
Gibana-bana nga moabot ngadto sa lima ka andana ang kada edepisyo ug posibleng maka-accommodate matag usa ka building og 100 ngadto sa 150 ka pamilya. —Rowena D. Capistrano/BDB (BANATNEWS)
- Latest