Cebu City nangandam sa ika-86th charter day

CEBU, Philippines — Sa pagtapos sa mga dagkong kalihokan kalabotan sa Sinulog ang kagamhanan sa Dakbayan sa Sugbo nag-andam na alang sa ika-86th  nga charter day sa Siyudad diin gilangkuban sa daghang  kalihokan.

Si City Administrator Suzanne Ardosa nipahibawo kagahapon atol sa ilang flag raising activities sa lain-laing mga kalihokan diin gidasig sa mga empleyado nga mosalmot gikan sa quiz bees hangtud sa tree-planting event.

Alang sa mga empleyado pipila sa mga kompetisyon nga ilang gipaabot nga apilan naglakip sa Cebu City Hall Got Talent, fitness challenge pinaagi sa Wellness Day ug quiz bowl.

Adunay family day sa South Road Properties diin ang mga empleyado ug ilang mga sakop sa pamilya makatagamtam sa lain-laing mga kalihokan, kompetisyon ug libreng health checkup.

Si Mayor Michael Rama giingong mohatag usab og award sa labing maayong mga empleyado ug sa labing maayong mga departamento.

Usa ka inter-department showcase sa usa ka mall ang himuon aron mahibaw-an sa publiko ang lain-laing mga serbisyo nga gitanyag sa matag departamento sa kagamhanan sa siyudad.

Usa ka massive tree-planting activity ang gitakda usab dili lang alang sa mga empleyado lakip ang tanang indibidwal nga gustong moapil sa kalihokan isip ilang bahin sa programa alang sa kalikopan sa siyudad. Samtang ang mga gagmay’ng negosyo sa dakbayan magpahigayon usab og fair diha sa Plaza Sugbo grounds.

Ang mga batan-on sa siyudad gikatakda usab nga mopakita sa ilang mga talento sa Balak ug Awit.

Ang top tax-payers hatagan usab og recognition gumikan sa ilang mga kontribusyon sa siyudad ug kabahin kini sa taxp ayers’ night ug testimonial dinner.

Gitakda usab ang usa ka seremoniyas sa pagsulat alang ni kanhi Don Vicente Rama ingon man usa ka exhibit sa iyang memorabilia.

Atol sa charter day Karong Pebrero 24, 2023 adunay misa ug launching sa Cebu City hymn contest ug inagurasyon sa pipila ka computer projects ug paghatag og pasidungog sa mga mga Sugbuanon nga nihimo og bililhong kontribusyon ug dungog sa siyudad. Caecent No-ot Magsumbol, Rowena D. Capistrano (BANATNEWS)