P9.2 milyones shabu, pito nadakpan sud 12 –oras

CEBU, Philippines — Dili mominos 1.4 ka kilo sa ‘shabu’ nga mobalor tanan og P9.2 milyones ang nasakmit sa pito ka mga buy-bust operation sa Central Visayas sulod sa 12 ka oras.

Mokabat usab sa pito ka gidudahang drug personalities ang nasikop gikan sa maong mga operasyon nga gipahigayon sa mga dakbayan sa Sugbo ug Mandaue ingon man sa mga dapit sa lalawigan sa Sugbo ug Negros Oriental gikan niadtong Enero 28 ngadto sa 29, 2023.

Si Police Brigadier General Jerry Bearis, direktor sa Police Regional Office sa Central Visayas (PRO-7), niingon sa iyang report nga kining malampuson nga mga nahimo resulta sa ilang mga bag-ong estratehiya batok sa ilegal nga drugas.

“This one-day accomplishment demonstrates the PRO7’s huge progress in innovating strategies in the pursuit of lawless criminals and keeping our communitnty”ingon ni Bearis. Niadtong Enero 28 nga operasyon, nadakpan si Jeremie Sun, alyas “Opaw” taga sa Sitio Baktan, Barangay Sapangdaku sa dakbayan sa Sugbo. Nakuhaan kini og 600 gramos nga gituohang shabu nga mobalor og P4 milyones  niadtong Sabado, Enero 28, sa Barangay Subangdaku sa dakbayan sa Mandaue.

Ang pagkasikop kaniya gihimo sa mga personahe sa City Intelligence Unit ug City Drug Enforcement Unit sa Mandaue City Police Office.

Pagka alas-9 sa gabii sa samang adlaw sa Compostela, nadakpan sab si Jason Matugas ug nakuhaan og 52.5 gramos nga ‘shabu’ nga nagkantidad og P357,000. Si Matugas lumulupyo sa Tuburan, nalakip sa Unified PNP-PDEA Top 10 Regional Priority Target.

Mga alas 10:05 sa gabii nasikop sab sa kapulisan sa dakbayan sa Sugbo ang usa ka 52-anyos nga babaye, usa ka Imelda Merecidio, taga Minglanilla.

Ang kapulisan sa Guadalupe maoy nisikop ug nasakmit ang 150 gramos nga ‘shabu’ nga mobalor og P1 milyon sa Paseo Arcenas Drive sa Barangay Guadalupe.

Paglabay sa usa ka oras, laing gidudahang drug personality nga si Bryan Pepito, 43, nasikop ug nakuhaan og 175 gramos nga ilegal nga drugas nga nagkantidad og P1.1 milyones sa Barangay Cotcot sa lungsod sa Liloan. Sama ni Matugas, nalista si Pepito sa Unified PNP-PDEA Top 10 Regional Priority Target.

Ang operasyon batok kang Pepito hiniusang paningkamot sa provincial intelligence ug drug enforcement units sa Cebu Police Provincial Office, personnel sa 1st Provincial Mobile Force Company, Liloan police, ug PDEA-7.

Pag tungang gabii niadtong Enero 29, 2023, usa ka 18-anyos nga drug suspect ang nakuhaan og 216 gramos nga ‘shabu’ nga adunay market value nga P1.4 milyones sa C. Padilla Street, Brgy. Duljo Fatima, dakbayan sa Sugbo.

Ang kapulisan sa Mambaling niila sa suspek nga si Mharjervin Orlanda Abellana, taga Barangay Tisa, dakbayan sa Sugbo.

Pasado alas 6:46 sa buntag kagahapon Enero 29, nagpahigayon og anti-drug operation ang kapulisan sa Negros Oriental pinaagi sa pagpatuman sa search warrant sa Zone 2, Barangay Looc sa dakbayan sa Dumaguete.

Nadakpan ang subject nga si Bergen Aguilar kinsa nakuhaan og 107 gramos nga shabu nga nagkantidad og P727,000.

Dugang pa, usa ka 38-anyos nga lalaki nga taga Dalaguete ang nakuhaan og 100 gramos nga ‘shabu’ nga mobalor og P680,000 atol sa buy-bust operation sa Barangay Capitol Site pasado alas 8 sa buntag niadtong Domingo, Enero 29.

Ang kapulisan sa Abellana nihangyo nga dili ibutyag ang ngalan sa maong suspek samtang nagpaabot sa ilang follow-up operation, gitanggong siya karon sa Abellana Police Station.— /IBM (BANAT NEWS)