Duha ka senior citizens patay sa bangga  

CEBU, Philippines —  Namatay ang manag-live in nga mga senior citizens sa dihang ang motorsiklo nga ilang giluwanan  nadasmagan sa bus nga pasaheroan sa miaging Lunes sa buntag sa Barangay Poblacion sa Siyudad sa Danao.

Si Police Staff Sergeant  Arzie Hill  Biatingo sa Danao  City Police Station miila sa mga biktima nga mao sila si Cal Laurente,  66,  ug Fe Dela Cruz, 60, mga molupyo  sa Barangay Taytay sa maong siyudad. Matud pa ni Biatingo nga gimaneho sa biktima nga si Laurente ang NMax niining motorsiklo gikan sa ilang panimalay ug angkas usab niini ang iyang kapuyo nga si Dela Cruz. Sa paghidangat  nila sa eskina nga bahin sa  Barangay Poblacion nadasmagan sila sa bus pasaheroan nga gimaneho ni Ruben Ebale, 40, molupyo sa Lungsod sa Sogod.

Matud pa ni Biatingo tungod sa kusog nga impact sa pagdasmag nangalagpot ang duha ug nakaangkon og grabeng kadaut sa ilang kalawasan. Gikatahong unang namatay si Dela Cruz ug namatay usab nianang pagkahapon si Laurente diha sa tambalanan.

Si Biatingo miingon nga si Ebale kasamtangan karong gitanggong sa sulod sa ilang detention cell alang sa tukmang lakang nga ilang pagahimoon  batok niini.