CCPO ug The Fraternal Order of Eagles milusad sa “Checkpoint of Joys”

CEBU, Philippines —  Gipahigayon sa Cebu City Police Office ug sa The Fraternal Order of Eagles - Philippine Eagles Central Visayas Region 1 ang pagpanghatag og gasa sa mga driver sa mga public utility jeepney ug sumasakay nga gitawag og “Checkpoint of Joys”.

Nasayran nga ang maong kalihukan matag tuig panahon sa pasko himoon sa The Fraternal Order of Eagles - Philippine Eagles Central Visayas Region 1.

Ang kalihukan gipanguluhan ni Police Col. Ireneo Dalogdog, Director sa CCPO ug gitambungan nila ni Kuya Governor Jun Carillo, Regional Governor, Central Visayas Region; Kuya Jerry Martinez Jr., Vice Governor, Central Visayas Region, Kuya Jose Marven Bayno, President Sugbo Ilustrados Eagles Club, Kuya Morit Maurillo, President Leon Kilat, Kuya Mark Boyo, President Cebu Unified Eagles Club, Kuya Wilson Gullim, President Sugbo Hermanos Eagles Club, Kuya Erwin Elegino, President Southern Cebu Peacemaker Eagles Club, Kuya Brian Yuson, President Cebu Queseo Eagles Club.

Human makahatag sa ilang mga mensahe gisugdan dayon ni Police Col. Ireneo Dalogdog, ang pagpanghatag og bugas, de lata ug uban pang grocery items sa mga PUJ Drivers nga moagi gawas sa Camp Sotero Cabahug sa Gorordo Avenue, ning siyudad.

Ilang gihimo ang pagsita sa mga drivers ug pangayoan og lisensya apan surprisa nga itunol ang gasa.

Tinguha nila nga maghatag og kalipay sa katawhan ilabi na karon nga 21 ka adlaw nalang saulogan na ang Pasko.

Aron daghan gyud ang makadawat og pahalipay ang Police Staton 1 hangtud sa 11 gihatagan og 50 ka bundles of joy aron sila na ang mohatag niini sa mga drivers ug commuter ubos sa ilang area of jurisdiction.

Pipila sa mga nakadawat nga drivers makita ang dakong kalipay ug nagpasalamat sa maong programa sa CCPO ug sa The Fraternal Order of Eagles. (BANAT NEWS)