Mga pasaheroang pirmeng mag –overloading gireklamo
CEBU, Philippines — Sa pagsugod pa lang sa unang adlaw sa buwan sa Disyembre ubay-ubay na ka mga pampublikong sakyanan ang na-isyuhan og citation tickets gumikan sa overloading.
Ang operasyon gihimo tungod sa reklamo sa mga commuters nga magpatuyang og pasakay og pasahero bisan puno na ang mga pasaheroan.
Sa taho sa hepe sa Cebu City Transportation Office (CCTO) nga si Raquel Arce kagahapon sa buntag , 27 ka mga pasaheroan ang ilang giisyuhan og citation tickets tungod sa overloading, samtang 23 ang nangadakpan kay walay CCTO ID.
Giawhag ang mga nangadakpang drayber sa pagbayad sa ilang mga violation diha sa buhatan sa CCTO ikaduhang andana sa Ramos Public Market aron dili kini mapasakaan og kaso sa korte.
Misaka sab ang gidaghanon sa mga nakalapas sa mga lagda sa trapiko.
Sa buwan sa Oktubre nakaisyu ang CCTO og 12,186 ka citation ticket, apan pag-abot sa Nobyembre niabot kini og 16,332 .
Naka impound usab ang CCTO og 672 ka motorsiklo,292 ka e-bikes, 32 ka tricycle, 56 ka pribado nga sakyanan, 14 ka trisikad, duha ka truck ug 876 ang na-clamp sa buntag ug gabii nga operasyon.
Kasagaran sa mga nangadakpan sab sa nadakpan walay rehistro , way lisensya ug kulang pa ang uban nga mga dokumento. — /IBM (BANAT NEWS)
- Latest